De Vereiniging is opgerich op 16 jannewarie 1960 in 't veurmalige café ’t Kluisje. Ein aantal luuj van de vootbalvereiniging De Wertha Boys ware van meining dat d'r in de woonwiek de Kloes get meë aan georganiseerd karnaval g...
De Vereiniging is opgerich op 16 jannewarie 1960 in 't veurmalige café ’t Kluisje. Ein aantal luuj van de vootbalvereiniging De Wertha Boys ware van meining dat d'r in de woonwiek de Kloes get meë aan georganiseerd karnaval gedaon moosj waere. Me vormde eine Raod van Èllef en reep 'ne Prins oet. Eine naam veur de vereiniging waas al sjnèl gevónje; De Sjoutvotte. Dit waas de sjtart gewaes van ein vereiniging die ummer in bewaeging is gebleve.
Eësjte prins is Lambert I (Derrez) in 1960 en eësjte president is Piet Giesberts in 1961. De tempel van de Sjoutvotte woort de Heremiet gelaege aan de Kloes.
Achter de naam Sjoutvotte zit natuurlik ein verhaol. Lètterlik vertaald in 't Nederlands is 't Schuld-konten. De Gelaense woonwiek en parochie de Kloes breide in de vieftiger jaore heël sjnel oet, väöl inwoners ware doe wirkzaam op de Sjtaatsmien Maurits in Gelaen. In die jaore begoosj 't eige-hoes bezit op gèng te kómme en d'r wore dan ouch väöl weuninge, al dan neet in eige beheër, geboewd. Óm dae boew te kènne bekostige moosj me uteraard geldj leëne, sjöld make dus. Ein Limburgse oetdrökking veur emes dae sjölde haet is; Dae haet de vot vol sjout!. De naam Sjoutvotte waas doe daomit gebaore.